ليك الحق تتمرد - انا مع تمرد -

ليـك حــق

بعد إنتخاب الرئيس ووضع دستور جديد نتساءل ...

فين مشروع النهضة ؟، فين محاكمات العسكر ؟، فين إعادة محاكمات مبارك ونظامه ؟، فين المليارات اللي بتجيلنا من الدول التانيه ؟، فين المصانع الوهمية اللي بتفتح عندنا كل شوية ؟، فين رغيف العيش النص متر ؟، فين أدلة تورط جبهة الإنقاذ في موقعة الإتحادية ؟، فين خطة إسقاط الرئيس ؟، فين تسجيلات المحكمة الدستورية ؟، فين الملفات السودا اللي هيطلعها النائب العام ؟، فين خطة الـ١٠٠ يوم ؟، طب الـ٢٠٠ .. ٣٠٠ !؟، فين الحكومة القوية ؟، فين تطهير الداخلية ؟، فين الديمقراطية والعدالة الإجتماعية !!؟ فين ..!!؟ فين ...!!؟ فين .....!!!؟

شباب كتير ماتت فى الثورة دى علشان مصر، ضحُّوا بحياتهم وأهلهم علشان انتوا تعيشوا حياة عادلة،، الناس دى نزلت التحرير وهى مش مستنِّيه تظهر فى التلفزيون ولا عايزه منصب فى وزارة ولا حتى إزازة زيت ثمن صوتهم وإنسانيتهم ..

الشهداء اللى لسه ماجاش حقُّهم لحد دلوقتى كان نفسهم فى رئيس يحكم بالعدل.. وبديننا الإسلامى زى ما قال لنا الرسول .. ويساعدونا مش يساعدوا الجماعة، كان كل طموحهم إنهم ينزلوا يجيبوا رغيف عيش يليق بالإنسان .. مش رغيف العيش اللى الحكومة بتعطف بيه عالشعب ..

إنت عارف إن ليك الحق تطلب من الحكومة دلوقتى:

·         عيش كويس من غير ما تقف فى الطوابير بالساعات.

·         مواصلات كويسه مش تركب طيارة وتموت ولَّا تركب قطار ويخرج بيك من عالقضبان ولَّا تركب عبَّارة وتغرق بيك فى البحر.

·         من حقَّك توصل شغلك فى ميعادك مش تقف فى زحمة المواصلات بالساعات وفى آخر الشهر تلاقى المرتب كله خصومات.

·         من حقَّك تطالب الحكومة بتطبيق الحد الأدنى والأقصى للأجور.

·         مش عايزين نموت من الملل فى كل خطاب للرئيس وفى الآخر مانطلعش بحاجة مفيدة.

أنا قُلت فى الإستفتاء على الدستور )لا( وانت قولت )نعم) علشان الإستقرار وبناء مؤسسات الدولة، وفعلا الدستور قال نعم، ومشُفناش استقرار، بالعكس كل يوم شباب بتموت ولا شُفنا مؤسسات للدولة اللى دلوقت بيحاولوا يأخوِنوها.

إنت لسه مخدتش حقك، وانا كمان.. علشان كده انا معارض علشان يرجع الحق لأصحابه .. هُمَّا قالوا عليَّا علمانى وليبرالى وكافر علشان انا بقول إن هُمَّا السُلطة والقرار فى إيديهم ...

السٌلطة دى معندهاش إرادة لحل أى مشكلة لأن كل همَّها الكرسى وبس ..

أنا دورى كمعارضة إنِّى أطالب بحقوق المواطن الغلبان والفت انتباه الحاكم واقوله "حاسب.. إنت كده ظالم"،،

أنا بقدِّم حلول لكل مشكلة والمفروض إن السلطة هى اللى تنفِّذها.. المعارضة مش صاحبة أى قرار فى البلد.. الشعب انتخب رئيس مانتخبش المعارضة، وعلشان الحاكم فاشل فبيرمى بالحجج هو وجماعته على المعارضة إنها السبب فى توقف عجله الإنتاج.. مع إن أصلا مفيش عجلة إنتاج.

فى أى بلد فى العالم،، الرئيس بيفقد شرعيته لما بيعرَّض شعبه اللى انتخبه لفقر أومهانة أوذٌل وموت

والسؤال هنا ... إنت وصلك حقك!!؟ ولا هتدور عليه معانا !!؟ حقكك موجود عندنا -حقك فى 

تمرد